خطوات تنظيف وتخزين السلاح

السلام عليكم ورحمة الله وبركاته
خطوات تنظيف وتخزين السلاح
انا هقول الخطوات وبشكل عملى يعنى بدون مبالغة او تفريط بحيث ان السلاح زى اى شىء ممكن تقتنيه فى الدنيا لازم تحافظ عليه بل واكتر كمان لان عند اهماله عمدا او الجهل بخطوات الحفاظ عليه هيكتر اعطاله ويقلل عمره
امتى ننضف السلاح؟ وازاى ؟
مش محتاجين نشغل نفسنا ونسأل عن مواقيت تنظيف السلاح ببساطة مش محتاجين ننضف السلاح اكتر من مرة بعد استخدامه لازالة الاتربة وبقايا البارود المحترقة لانها مع تراكمها ومع الوقت بتسبب مشاكل فى عمل السلاح
طيب ازاى ننضفه
بسيطه قوى
بيكون فى منتجات كتير مخصصه لغسيل وتنضيف السلاح او حتى بالبنزين او الجاز وبعد تفكيك السلاح بالكامل وتنضيفه باستخدام الفرشاة المخصصة وفرشاة الاسنان مع الجاز لان فرشة الاسنان هتكون افضل فى تنضيف باقى اجزاء المسدس بخلاف الفرشة المخصصة لتنضيف الماسورة
بعد تنظيف اجزاء المسدس وغسلها جيدا بالجاز يراعى تجفيفها جيدا من الجاز لان وجوده يسبب ضرر للمعدن ويستخدم هنا قطعة قماش من القطن الابيض للتجفيف وبالنسبة للسبطانة يراعى استخدام شرايط من القطن وادخالها من بيت النار واخراجها من الناحية الاخرى (فوهة) الماسورة وبعد التجفيف جيدا من الجاز يستخدم اى مزيل صدأ للتنضيف مرة اخرى وازالة اى صدأ مرئى او نتوء غير مرئى وبعد تنظيف اجزاء السلاح بالكامل بمزيل الصدأ يتم التجفيف مرة اخرى بالكامل بعد تركة بضع دقائق على جسم المعدن ثم تغطية اجزاء السلاح الداخلية بالكامل بالزيت المخصص للسلاح او اى نوع زيت مناسب
بس كده انتهت عملية تنضيف السلاح
طيب ماذا عن تخزين السلاح ؟؟؟
نفس خطوات التنظيف ولكن يراعى زيادة كمية الزيت وتغطية جسم السلاح بالكامل بطبقة من الزيت لعزله عن الهواء ثم حفظ اجزاء السلاح المفككة داخل كيس بلاستك ويفضل وضعه بعد ذلك داخل صندوق خشب
اما اذا كان التخزين بفصل الصيف فهنا يفضل استبدال الزيت بالشحم
ده كل شىء عن التنضيف والتخزين من غير حشر كتير وخطوات مالهاش لازمه
طيب حد يقلى يعنى مش لازم ننضف السلاح قبل استخدامه ؟
هقوله لا بما انك منضفه وشايله نضيف وتمام
طيب حد يقلى بس انا سمعت قبل كده عن تنضيف السلاح قبل استخدامه ؟
اقله مش تنضيف خلينا نقول تشييك على السلاح قبل استخدامه وده شىء لازم بنعمله دايما قبل استخدام اى سلاح
وطبعا لما حضرتك تستخدم السلاح بعد ما كنت مخزنه لمدة بدون استخدام وترجع تشيك عليه قبل ما تستخدمه هتلاقى ان فى زيت او شحم زياده داخل وخارج المسدس هنا مش هتنضف بس هيتم ازالة الشحم او الزيت الزائد ويتم تنضيف جسم السلاح الخارجى بالكامل من اى زيت او شحم
وبعد الاستخدام هتنضف السلاح
ده كل شىء عن تنضيف او تخزين السلاح